පිරිමියෙක්‌ සහ ගැහැනියක්‌ සරණ බන්ධනයට එළැඹෙද්දී විවාහ රෙජිස්‌ට්‍රාර් ඉදිරියේ මහා දිග වගන්තියක්‌ කියවමින් විශාල පොරොන්දුවක්‌ දෙයි.
කුඩා පිත්තල කුකුළා පහන සහ පැදුරු බාගයක්‌ පමණ විශාල විවාහ ලේකම් පොත තැබූ සුදු රෙද්දක්‌ එළන ලද මේසය වටේ රොක්‌වී සිටින සමීපතයන් සහ සාක්‍ෂියට අත්සන් කරන දෙන්නාටද ඇසෙන අයුරින් රෙජිස්‌ට්‍රාර්වරයා කියන දෙයම ගිරවෙක්‌ මෙන් කියන මනාල ජෝඩු මෙන්ම තමන්ටවන් නෑසෙන අයුරින් තොල් පට පමණක්‌ සොළවමින් මෙම වගන්තිය කියවන මනාල ජෝඩුද මම අනන්තවත් දැක ඇත්තෙමි.
පල්ලියේ විවාහ වන කතෝලික ජෝඩුද තම දේවස්‌ථානය භාර පියතුමා හෝ දේවගැතිවරයා ඉදිරියේ ශුද්ධ බයිබලය මත අත් තබා ප්‍රකාශ කරන්නේ මේ පොරොන්දුවමය. සාමාන්‍යයෙන් කිතුනුවන් විවාහ වන්නට පෙර මාස තුනක්‌ පමණ කාලයක්‌ තිස්‌සේ විවාහ ගිවිසගත් යුවළ වෙත පාදිලිතුමා විසින් පාඩම් මාලාවක්‌ උගන්වන අතර එහි අන්තර්ගතය වන්නේ සාර්ථක යුග දිවියක්‌ පවත්වාගන්නේ කෙසේද යන්නයි.
අප විවාහ වී දැන් මඳ කලක්‌ ගතවී ඇති නිසා මෙම පොරොන්දු වගන්තිය වචනයෙන් වචනයට මට මතක නැති වුවත් එහි හරය වන්නේ කිසි දිනක තම සහකරු හෝ සහකාරිය හැර නොයන බවට දිවි හිමියෙන් පොරොන්දු වන බවයිs.
මෙසේ පොරොන්දු වී පොතේ අත්සන් කළ සැණින් සමහරු විවිධ දේ කරති. මුදු මාරු කරති. තවත් අය කේක්‌ කපති. තව සමහරු ගී ගයා නටති. පුද පූජා පවත්වති. මධු විත තොල ගාති. රසමසවුළු බුදිති. හිනාවෙති. ප්‍රීතිවෙති. එමෙන්ම රණ්‌ඩු සරුවල් වෙන ගහ මරා ගන්නා අයද සිටිති. එවැනි දේ ගැන පත්තර පිටුවක්‌ නොව පොත් ගණන් හෝ ලිවිය හැකි වුවද අද අපේ මාතෘකාව විවාහ වීම නොව ඊට හාත්පසින්ම විරුද්ධ දෙයක්‌ වන දික්‌කසාදය ගැන නිසා පොරොන්දු වගන්ති ගැන ලිවීම නවතා අදාළ මාතෘකාවට බසිමි.
අද උදේ කිසියම් සේවා කටයුත්තක්‌ සඳහා මා හමුවට මිතුරු සෙවණ කාර්යාලයට පැමිණි තරුණ ගැහැනියද එකතු කළ කල පසුගිය වසර පහ තිස්‌සේ මට දික්‌කසාද වුණු අය එකසිය තිස්‌ අට දෙනෙක්‌ මුහුණට මුහුණ හමුවී තිබේ. මා උපන්දා සිට ගතහොත් මට හමුවුණු එවැන්නෝ දහස්‌ ගණනක්‌ පමණ වනු ඇතැයි සිතිය හැක. ඊට අමතරව පත්තර වලින් කියවන කනට අසන්නට ලැබෙන රූපවාහිනියේ දකින චාල්ස්‌ ඩයනලා බ්‍රිට්‌නිලා රිචඩ්ලා වැනි දික්‌කසාද වන්නෝ කොතරම් සිටීද?
රන් රස සේ එකට වෙළී දිවෙන් දිවගාගෙන සිටින ජෝඩු හිටිහැටියේ වෙන් වී යයි. සමහරුන්ගේ දික්‌කසාදය සිදුවන්නේ ක්‍රම ක්‍රමයෙනි. සෙමෙනි. කොහොම කෙසේ සිදු වුණද දික්‌කසාදය යනු දුක ඇතිකරවන අනුමත කළ නොහැකි අවර ගනයේ කරුණක්‌ බව කිව හැකිය.
අපේ ගෑනිට මාව රුස්‌සන්නේ නැහැ. මම ඇන්දත් වැරදියි. කෑවත් වැරදියි. ටෙලිවිෂන් එක බැලුවත් වැරදියි. එයාගේ දුක සැප ඇහුවත් වැරදියි. අනේ මන්දන්නෙ නැහැ මහත්තයෝ. මට දැන් මේ ජීවිතේ එපා වෙලයි තියෙන්නේ" වරක්‌ මා හමුවට පැමිණි සරත් නම් අයෙක්‌ එසේ කියනු මට මතකය.
අත්හැරෙන දීගේ හෙවණැල්ලත් ඇදයි කියා අපේ සිංහල කියමනක්‌ තිබේ. සරත් වැනි අයෙකුට මඳක්‌ ඇහුම්කන් දුන්නොත් එසේ කියන්නේ ඇයිද කියා තේරුම් ගැනීම අපහසු නැත.
පසුගිය කාලයේ මට හමුවූ දික්‌කසාද වුණු බොහෝ චරිත සමග මා කතා කර ඇති අතර ඉන් වැඩිදෙනකුගේ අදහස්‌ සහ විස්‌තර සටහන් කර ගෙනද ඇත්තෙමි. ඔවුන් කියූ කරුණු වලට අනුව ඒ අය දික්‌කසාද වීමට හේතු මෙසේ වෙන් කර පෙන්වා දිය හැක.
* අදහස්‌ නොගැලපීම
* වෙනත් සබඳතා ඇති වීම
* නොසලකා හැරීම
* මානසික හා ශාරීරික පීඩා කිරීම
* ශාරීරික දුබලතා සහ ලිංගික ගැටලු
* මානසික රෝගී තත්ත්වයන්
* මත්ද්‍රව්‍ය පිළිබඳ ප්‍රශ්න
* ආර්ථික ගැටලු
* දරුවන් නැතිකම
* දෙමාපිය සහෝදර හෝ දරුවන්ගේ බලපෑම
* රැවටිල්ලට අසුවී පසුව එය තේරුම් යැම නිසා
* හදිසි කෝපය නිසා ඇතිවූ ප්‍රශ්න
"වැඩිහිටියන් ඇඹුල් කනවිට දරුවන්ගේ දත් හිරිවැටෙන්නේය" කියා අති පැරණි හෙබ්‍රෙව් පිරුළක්‌ තිබේ. මේ අනුව දරුවන් සිටින දෙමාපියන් යම් හෙයකින් දික්‌කසාද වුවහොත් එය බෙහෙවින්ම බලපාන්නේ තම දරුවන්ටය. මතින් මිදෙනු පිණිස අපේ මිතුරු සෙවණ වෙත දිනපතා එන තරුණ මත්ලෝලීන්ගෙන් බහුතරයක්‌ දික්‌කසාද වුණු හෝ වෙන් වුණු දෙමාපියන්ගේ දරුවන්ය.
දික්‌කසාද (ඩිවෝස්‌) වීම සහ වෙන් වීම (සෙපරේට්‌) යනු එකිනෙකට බොහෝ සමානකම් ඇති ක්‍රියා දෙකකි. මෙසේ දික්‌කසාද වුණු හෝ වෙන් වුනු අයගේ දරුවන් මත්ද්‍රව්‍ය වලට යොමුවීමේ ප්‍රවණතාව අති මහත් සේම එම අයගේ දූදරුවන් වෙනත් සමාජ විරෝධී විෂම කටයුතු සඳහා පෙළඹෙයි. එමෙන්ම විවිධ මානසික රෝගී තත්ත්වයන්ට පත්ව පීඩා විඳියි.
"මට පිරිමි පේන්න බැහැ හැම පිරිමියෙක්‌ම මට පේන්නේ අපේ තාත්තා වගෙයි. එයා හැමදාම රෑට බීගෙන ඇවිත් අම්මව බිම දාගෙන ගහන හැටි මට මැවිල පේනව. ඒ විතරක්‌ද අපිව කී පාරක්‌ උසාවි නැග්ගුවද එයාලගේ දික්‌කසාද නඩුවෙදි අපේ අම්ම වින්ද දුක දැකලම මට කසාද බඳින්න එපා වුණා මට මැරෙනකං මෙහෙම හොඳයි"
අධික ලෙස මත්පැන් බීමට ඇබ්බැහි වූ චන්දි නම් තරුණිය එසේ කියා සිටි අතර පිරිමි සංහතියටම වෛර කරන ඇය තම තනියට ඉතා සමීපව ඇසුරු කරන්නේ ඇයට වඩා වයසින් බාල තවත් ඒ වාගේම පිරිමි අරහං යුවතියකි. එක කාමරයක්‌ කුලියට අරන් එහි නැවතී එකටම සිටින ඔවුන් දෙදෙනා සමලිංගික සේවනයේ යෙදෙන්නියන් බව ඔවුන් වැඩ කරන ක්‌ලීනිං කොම්පැණියේ සියලු දෙනාම දනිති. මා මේවා ලියන්නේ මෙවැනි අවර ගනයේ වැඩවලට හේතු පාදක වන්නේ දෙමාපිය දික්‌කසාදය බව පෙන්වා දීමටයි.
අද අප රටේ දිස්‌ත්‍රික්‌ උසාවියකට ගියොත් අපට වැඩිපුරම දකින්නට ලැබෙන්නේ වන්දි නඩු, නඩත්තු නඩු හෝ දික්‌කසාද නඩුය. දික්‌කසාද වූ පසු පිරිමියා විසින් තමාගේ හිටපු බිරිඳට හා දරුවන් ඇත්නම් ඒ අයට ගෙවිය යුතු නඩත්තු මුදලට සමාජයේ කියන්නේ වංගෙඩි බද්ද කියාය. මෙසේ වංගෙඩි බදු ගෙවන්නෝ අද අප සමාජයේ එමටය.
මත්පැන් පානය හෝ මත්ද්‍රව්‍ය භාවිතය අද දික්‌කසාද වීමට බලපාන ප්‍රධාන සාධකයකි. මත් භාවිතය නිසා ආර්ථික ගැටලු පැනනැඟේ ශාරීරික රෝගාබාධ මෙන්ම මානසික දුර්වලතා ඇතිවෙයි. එසේම ලිංගික ජීවිතයේ අඩුපාඩු මතුවෙයි. මතින් බමන අයෙක්‌ සමග සංවාසයේ යෙදෙන්නට බහුතරයක්‌ ගැහැනු කැමැති නැත. එසේම මත්ලෝලී පුද්ගලයා පිරිසිදුකමෙන් පහත් මට්‌ටමක සිටින නිසා එයද ගැහැනියට බලපායි. බීමත් පුද්ගලයා ප්‍රචණ්‌ඩත්වය මවා පායි. අසරණ ගැහැනියට පහර දෙයි. සිත රිදෙන කතා කියයි. අපහාස අවලාද නඟයි. තම යුතුකම් වගකීම් පැහැර හරී නිවසේ ඇති දේවල් සොරකම් කරගෙන ගොස්‌ විකුණා ඒ මුදලින් මත්ද්‍රව්‍ය භාවිත කරයි. සමාජයේ කොන් වෙයි තැනකට එක්‌කන් යන්න බැරි තත්වයක්‌ උදා වෙයි. මෙම සෑම කරුණක්‌ම ඉවසාගෙන සිටින ගැහැනුන් ඉවසීමේ රතු කට්‌ට පනින විට කරන්නේ නීතිඥ මහතකු මුණගැසී තම දුක පවසා සිට දික්‌කසාදය වෙත පා තැබීමයි. නීතිඥ මහතා හමු වීමට පෙර දෙමාපිය සහෝදර පිහිට පතන අයත් එසේත් නැත්නම් අනියම් සැමියකුගේ හෝ රහස්‌ පෙම්වතකුගේ උපදෙස්‌ පතන කාන්තාවන් ද අපි දැක ඇත්තෙමු.
"මම මේ හැම දේම ඉවසගෙන ඉන්නෙ දරුවන් නිසයි. අයියෙ නැත්නං මං මේ තිරිසනාගෙන් වෙන්වෙලා ගොඩක්‌ කල්. මට ඕනි මිනිහෙක්‌ නෙමේ, දරුවන්ට නමට හරි තාත්ත කෙනෙක්‌. නැත්තං උන් ලොකු වුණාම අපි දෙන්නටම සාප කරයි"
ඒ මට හමුවූ තවත් ගැහැනියකගේ අඳෝනාවයි. මෙවැනි කාන්තාවෝ අද අප රටේ අනන්ත අප්‍රමාණව වෙසෙති. සමාජයට නොපෙන්නුවාට හිතේ ගිනි පත්තුවෙමින් මානසිකව උන් දුක්‌ වේදනා ඉවසන්නේ දරුවන් හෝ දෙමාපියන්ගේ සුබ සිද්ධීය ගැන සිතාය.
මේ එයට වඩා හාත්පසින්ම වෙනස්‌ චරිතයකි
"අපි දෙන්නා සුළු කාලයක්‌ ආශ්‍රය කරල විවාහ වුණා. බැඳල මාස හයක්‌ යන්න ඉස්‌සරින් අපිටම තේරුණා අපි දෙන්න ගැලපෙන්නෙ නැහැ කියල. අපේ අදහස්‌ හරි වෙනස්‌ ආකල්ප වෙනස්‌. ලිංගික ජීවිතෙත් නියම සතුටක්‌ ලැබුවෙ නැහැ. ඒ නිසා දෙන්න කතා වෙලා බොහෝම සමාදානෙන් උසාවි ගිහින් නීත්‍යනුකූලව වුණා එයා ආයෙත් බැන්ද. මමත් ළඟදීම බඳිනවා. අපි අතර කිසිම තරහක්‌ නැහැ. ගිය සිංහල අවුරුද්දට අපි දෙන්න තව කට්‌ටියක්‌ එක්‌ක බස්‌ එකක යාපනේ විනෝද ගමනක්‌ ගිහිල්ලත් ආවා"
රාජිනී වැනි මෙවන් චරිත තවත් සිටිති. සමහරු දික්‌කසාද වන්නේ දරුවන් නැති නිසාය. සමන් එවන් අයෙකි.
"අපි බැඳල අවුරුදු අටක්‌ හොඳට සතුටින් හිටියා. හැබැයි අපට බබාලා හිටියෙ නැහැ. ලංකාවේ ඉන්න හැම දොස්‌තර කෙනෙක්‌ ලගටම වගේ ගියා වෙද හාමිනේලා දහයක්‌ විතර බලන්න ගියා. දවසක්‌ එක දෛවඥයෙක්‌ මගේ මුහුණටම කීවා, මහත්තයට දරුපල නැහැ කියල. මගේ බිරිඳට ඒකට හරිම දුකයි. හැබැයි බටහිර වෛද්‍ය වාර්තා නම් ඒ බව කියල නැහැ. කොහොම හරි මං කියල කියල අන්තිමේ දෙමාපියන්ගෙත් අවසරය මත අපි දෙන්න දික්‌කසාද වුනා වැඩේ කියන්නෙ අපි දෙන්නම ආයෙ බැන්ද. මට අවුරුද්දෙන් බබෙක්‌ හම්බ වුණා. එයාටත් දැන් බබෙක්‌ හම්බවෙන්න ඉන්නවා. අපි වැඩිය ඇසුරු නොකළට කිසි තරහක්‌ මරහක්‌ නැහැ. සහෝදරයෝ වගෙයි.
මෙවැනි කතා අති විරලය. සමහරු විශ්වාස කරන්නේ පවා නැත. නමුත් විරල වුවද මෙහි ගත යුත්තක්‌ ඇතැයි සිතමි.
මගේ පළමුවැනි බිරිඳ හරිම උගත්. ඇය රූමතA වෛද්‍යවරියක්‌. හැබැයි අපිට දරුවන් නැහැ. ඒක එතරම් ප්‍රශ්නයක්‌ නැති වුණත් මගේ බිරිඳ හරි නපුරුයි. මට කතා කරන්නෙ බල්ලෙකුට වගේ. මට කියල පොල් ගාව ගන්න එයා හරි ආසයි. ඒ වගේම සෙරෙප්පුවෙන් ගහලා ලොකු වින්දනයක්‌ ලබනව. මට එයාව මගේ එක පාරකට මදි. නමුත් කසාද ගෑනි කියල ඉවසන් හිටිය අවුරුදු ගාණක්‌. බැරිම තැන මම එයාගෙන් වෙන් වුණා, හැබැයි දික්‌කසාද වුණේ නැහැ. මම වෙන ආගමකට ගිහින් මම වගේම මගේ ක්‍ෂේත්‍රයේම උසස්‌ රජයේ රස්‌සාවක්‌ කරන සැමියා මිය ගිය වැදගත් නෝනා කෙනෙක්‌ විවාහ කර ගත්තා. අපි දැන් සතුටින් ඉන්නවා"
ඔහු මෙන්ම අද බොහෝ අය කරන්නේ වෙනත් විවාහයක්‌ කර ගැනීමට අවශ්‍ය නම් දික්‌කසාද වීම නොව ආගම මාරු කර ගැනීමයි. මුණසිංහ නම් වූ මා දන්නා එක්‌ ප්‍රසිද්ධ පුද්ගලයෙක්‌ මුනාස්‌ නමින් තම නම සහ ආගම වෙනස්‌ කරගෙන අලුත් විවාහයක්‌ කර ගත්තා මට මතකය.
ද්වේශ සහගත ලෙස හැරයැම යන මාතෘකාව යටතේ ඉතාම පහසුවෙන් දිස්‌ත්‍රික්‌ උසාවියකදී දික්‌කසාද නඩුවක්‌ ජය ගත හැකිය. නමුත් එය සාධාරණ ලෙස ඔප්පු කර පෙන්විය යුතුය. අද අප රටේ දික්‌කසාද ගේම් බොහෝය. රට යනු පිණිස සමහරු දික්‌කසාද වෙයි. ඒ වෙන අයෙකු විවාහ කරගෙන ඔහුට ඇති විදෙස්‌ වරප්‍රසාද භුක්‌ති විඳ ඒ මාර්ගයෙන් වීසා බලපත් ලබා ගැනීමටයි. සුද්දන් හෝ සුද්දියන් කසාද බැඳීම හෝ පිටරටක පුරවැසිභාවය ඇති අයට මේ ක්‍රමය යටතේ හොඳ ඉල්ලුමක්‌ තිබේ.
තමා කර ගත් දික්‌කසාදය නිසා දුක්‌වන අයත් මට හමු වී ඇත. මේ ඉන් කීපදෙනෙක්‌ ඉදිරිපත් කළ අදහස්‌ වෙයි.
"දැන් මතක්‌ වෙනකොටත් මට දුකයි. මම බොරුවට මගේ මහත්තයව සැක කරල අපේ අම්මලගෙ උවමනාවට එයාව ඩිවෝස්‌ කළා. එයා හරිම අහිංසකයි. මාව අපේ අය රැවැට්‌ටුවා පව් අහිංසකය. ඒ කාලෙ කොච්චර කිවුවද එයා නිර්දෝෂයි කියල ඒත් මට ඒවා ඇහුනෙ නැහැ, ඒත් දැන් මොනව කරන්නද එයා හිතේ අමාරුවට ඔස්‌ටේ්‍රලියාවට ගියා"
ගිය නුවණ ඇතුන් ලවාවත් අද්දවන්නට බැරි බව කියන්නේ මේ නිසාය
"මං නාලා තෙත තුවාය පිටින් නාන කාමරේ ඉඳන් එළියට ඇවිත් සාලෙ මැදින් යන කොට එයා පොළව අතු ගාමින් හිටියේ මට එයා කිව්වෙ කුස්‌සිය පැත්තෙන් යන්න කියලයි මම නෑහුණ ගානට ඉස්‌සරහින්ම ගියා ගෑනිට කේන්ති ගියා වචනයක්‌ මිස්‌ වුණා මගේ අත ඉස්‌සර වුණා අන්තිමේ රණ්‌ඩුව කෙළවර වුණේ උසාවි ගිහින්, දික්‌කසාද වෙලා. දැනුයි තේරෙන්නෙ අපි කොච්චර මෝඩද ඉක්‌මන්ද කියල"
මෙවැනි සුළු සුළු කරුණු දුර දිග ගොස්‌ එකිනෙකාට අපහාස කරගෙන අත පය උළුක්‌ කර ගෙන අන්තිමේ දික්‌කසාදයෙන් කෙළවර වුණු සිද්ධීන් බොහෝය ඒ අය අතරින් බොහෝ දෙනෙක්‌ තමා ගත් හදිසි තීරණ ගැන තාම දුක්‌ වෙති.
පැරණි ඊශ්‍රායෙල් නායකයෙක්‌ වන මෝසස්‌ ගේ ව්‍යවස්‌ථාවට අනුව තමාගේ බිරිඳ යම් විනය විරෝධී වැඩක්‌ කර අසු වුවහොත් ඇයට අත්හැරීම් පත්‍රයක්‌ දී වෙන් විය හැක. නමුත් දික්‌කසාදය ගැන යේසුස්‌ වහන්සේ මෙසේ උගන්වා ඇත
"තවද තමාගේ භාර්යාව දික්‌කසාද කරන කවරෙක්‌ නමුත් ඇයට දික්‌කසාද සහතිකයක්‌ දිය යුකු යෑයි පැරණි ව්‍යවස්‌ථාවේ කියා ඇත. එහෙත් මම නුඹට කියමි. වේශ්‍යාකම හැර අන් කරුණක්‌ නිසා සිය භාර්යාව දික්‌කසාද කරන කවරෙක්‌ වුවද ඔහු, ඇය කාමමිත්‍යාචාරයට පමුණුවන්නේය" මෙහි තේරුම වන්නේ කිතුනුවකුට දික්‌කසාද විය හැකි එකම හේතුව තමාගේ සහකරු හෝ සහකාරිය අනාචාරයේ හැසිරී අසුවුවහොත් පමණි. ඒ හැර වෙන කිසිම හේතුවක්‌ නිසා දික්‌කසාද වීම පාපයකි. එසේම අනාචාරයේ හැසිරුණු අය වරද පිළිගෙන පසුතැවිලිව හැරී ආවොත් කැමැති නම් සමාව දී නැවත පවුලක්‌ වශයෙන් ජීවත් වීමටද අවසර ඇත.
ඇතුළෙන් ගිනි ඇවිළෙද්දී ඒ බව පිටතට නොපෙන්වා බොරුවට රඟපාමින් ජීවත් වන පවුල් අද අප සමාජයේ කොතෙකුත් ඇත.
ඇත්තටම සමහර ගැහැනු හෝ පිරිමි දැන හෝ නොදැන කරන වැඩ වලට දික්‌කසාද වීමට නොව තව බොහෝ දේ කිරීමට සිතෙයි. මටද මේ දැන් රේණුකාව දික්‌කසාද කරන්නට සිතුණේ ඇය මා වටේ කරකැවෙමින් දැන් කෑම කාල ඉන්න කෑම නිවෙනව කියා කරදර කරන නිසා නොව මා මේ ලිපිය ලියමින් ඉන්න පරිගණකයට විදුලිය සපයන වයරය අත්වැරදීමකින් ඇය අතින් විසන්ධි වුණ නිසාය. මා ටයිප් කළ පිටු දෙක ගබඩා කර නොතිබූ නිසා මට වුණේ හරිම ඇබැද්දියකි. නැවත අලුතින් ටයිප් කරන්නට සිදු විය. හදිසි කේන්තිකාරයෙක්‌ට මෙය වුණානම් දික්‌කසාදයකින් කෙළවර වන මහ ගිනි වි-ජුම්බරයක්‌ අද මෙතැන සිදු වන්නට තිsබිණි.
බඳින්නට පෙර මේ මඟුල හරියනවාදැයි බලන ක්‍රම වේදයක්‌ යුරෝපයේ සහ ඇමෙරිකාව කැනඩාව වැනි රටවල ක්‍රියාත්මක වෙයි. මෙයට කියන්නේ ප්‍රැක්‌ටිකල් මැරේජස්‌ හෙවත් ප්‍රායෝගික ආවාහ කියාය දැන අඳුන ගන්නා පෙම්වතා හෝ පෙම්වතිය කොතරම් දුරට තමාට ගැලපෙනවාදැයි වසරක්‌ දෙකක්‌ හෝ ඊට වඩා වැඩි කාලයක්‌ ඇසුරු කර බලා හොඳනම් කසාද බැඳීමත් නරක නම් වෙන්වීමත් මෙහි සිද්ධාන්තයයි. මෙහිදී එක නිවසේ ජීවත් වීම එක යහන පරිහරණය ලිංගික එක්‌වීම ආදී සියල්ල කළ හැකිය ගැහැනිය කැමැති නම් දරුවන් හැදීමටද අවසර ඇත සංඛ්‍යාලේඛන වලට අනුව මෙවන් බොහෝ ප්‍රායෝගික ආවාහ කෙළවර වන්නේ වෙන්වීමෙනි.
වසර හතරක ප්‍රායෝගික විවාහයකින් පසුව තමන් හොඳින් ගැලපෙන බව තේරුම් ගෙන එය හිත මිතුරන්ට දන්වා උත්සව ශ්‍රීයෙන් නගරයේ ප්‍රධානතම දේවස්‌ථානයක තම මංගලෝත්සවය ගත් යුවළක්‌ ගැන මට ප්‍රංශයේ පැරිසියෙන් උදාහරණ පෙන්විය හැක. එහි සුවිශේෂීම කරුණ වූයේ මනාලියගේ අසලින් සිටි සිඟිති මල් කුමරිය ඔවුන්ගේම තුන් හැවිරිදි එකම දියණිය වීමයි. මේ මනාල මහතා වූයේ පාසල් කාලයේ මගේ අතිජාත කල්‍යාණ ගජයා මෙන්ම සමහරු අපාය සහායකයා යනුවෙන්ද හැඳින්වූ මා මිතුරු නිශාය. ඔහු අද ඔහුගේ ප්‍රංශ පුරවැසිභාවය ඇති පිලිපීනයේ උපත ලද බිරිඳ සහ දියණිය සමග පැරිස්‌ නගරයේ ඉතා සතුටින් ජීවත් වෙයි. මෙවැනි දේ අප සංස්‌කෘතියට අලුත් නුහුරු දේ වුවද යුරෝපයේ නම් නිතර දකින්නට ඇති සාමාන්‍ය දේවල්ය.
දික්‌කසාදය හොඳ නැත. ඒ නිසා නියපොත්තෙන් කඩන්නට හැකි දෙයට පොරව තියන්නට පෙර හැරෙන්නට බලමු. උසාවියක වුවද එක්‌ වරම දික්‌කසාදය දෙන්නේ නැත. මුලින්ම ඔවුන් සමථ මණ්‌ඩලයට හෝ පවුල් උපදේශන සේවයට යොමු කරන්නේ ඒ නිසාය.
දැන් අපි ලිපියේ අවසානයට ළංවෙමින් සිටිමු. ඒ නිසා කෙටි පණිවුඩයකින් ඉවර කරමු. අපට එකිනෙකා ඉවසන්නටත් අපට වැරදි කරන වුන්ට සමාව දෙන්නටත් හැකිනම් දික්‌කසාදය නොව ඕනෑම දෙයකට මුහුණ දිය හැකි වනු ඇත.
මිත්‍ර ශ්‍රී කරුණානායක
0 Comments