ඉන් දකුණට පසක්‌ද වමතට තුන් බාගයක්‌ සලස
මින් සෙසු තැන් බලා සොඳින තබනු ගෙදොරකඩ සිතුලෙස
සන්තොස ලද වැඩ සැදි විසුමවේය කළොත් මෙලෙස
ඔබ තනන සිරි නිවසේ මීළඟට වැදගත්ම ස්‌ථානය හිමිවන්නේ උළුවහු තැබීමේ කටයුත්තටය. ඒ සඳහාද පාද බෙදීමේදී නිවසේ ප්‍රධාන දොර තැබීම සඳහා සුදුසුම ස්‌ථානය සුබ දිසාවට අනුව ලකුණු කරගැනීම සුදුසුය. එහිදී නවග්‍රහ පාදයන් බෙදීම පැරණි සෘෂිවරුන් පවා අනුමත කර ඇති බව ශාස්‌ත්‍රීය පොත පතෙහිද සඳහන්ය.
දිග හෝ පළල 8 න් බෙදීමද මේ සඳහා සුදුසු ක්‍රමයක්‌ වන අතර ඉහත කවියෙන් කියෑවෙන ක්‍රමය ඉතා ශුභ ලෙස දැක්‌විය හැක. දිග් බිත්තියෙන් දොරටු තබා ඇති නිවෙස්‌ ප්‍රධානීන් මුදල් සෙවීමේදී උතුම් වූ මිනිස්‌ දහමට මුල්තැන දී කටයුතු කරන බවත් පළල් බිත්තියෙන් නිවසෙහි ප්‍රධාන දොරටුව තබා ඇති නිවෙස්‌වල ප්‍රධානීන් මුදල් ඉපයීමේදී අදහම රජකරමින් ඒ තුළ නිරත වීම ඇත්දැකීමෙන් පැවසිය හැකි කාරණයකි.
ඉහත කුමන ක්‍රමයක්‌ අනුගමනය කළද නිවසක මුල්ලක ප්‍රධාන දොරටුව තැබීම ඉතාම අශුභ ක්‍රියාවක්‌ ලෙස දැක්‌විය හැක. ඇතුල්වන පිටවන දොරටු දෙකද නිවසේ මැද දොරටු මුල්ලක තැබීම ගෘහ මූලිකයා රෝගියකු කරයි.
තවද එකී දෝෂයන් නිසාම ගෘහ මූලිකයා ස්‌නායු - නහර සම්බන්ධ ආබාධයන්ටද සුවනොවන රෝගී තත්ත්වයන්ටද පත්විය හැකි බව කිවහැකිය.
නිවසක ප්‍රධාන දොරටුව ගෘහ මූලිකයා ලෙසත් පිටවන දොරටුව ගෘහනිය ලෙසත් සලකන බැවින් මේවායේ උළුවහු තැබීම් කටයුතු ඉතා සුපරීක්‌ෂාකාරී ලෙස ක්‍ෂේත්‍රය ගැන මනා දැනීමක්‌ ඇති වාස්‌තු විද්‍යාඥයකුගේ අනු දැනුම මතම සිදුකිරීමට වග බලාගත යුතුය. පවතින ශුභ අශුභතාවන් පිළිබඳව වාස්‌තු විද්‍යාඥයාට තත්කාල පරීක්‌ෂාවේදී ප්‍රකාශ කිරීමේ හැකියාව තිබිය යුතුමය. එම නිසා නිවස පරීක්‌ෂා කිරීමට පෙර තත්කාල පරීක්‌ෂාවක්‌ සිදුකිරීම වඩා යෝග්‍යය.
නිවසේ ඇතුළත දොරටුවල පවතින දෝෂ තත්ත්වයන් නිසා නිවැසියන් නිතර නිතර ලෙඩ රෝගවලට භාජන වීමේ ඉඩකඩ වැඩිය. රෝගාබාධයක්‌ නැතිනම් මෙකී නිවෙස්‌වල සුවසේ නිදාගැනීමේ අවස්‌ථා හෝ හීනවී නිතර නිතර සිහිනෙන් බියවීම වැනි ආපදාවකට භාජන වන අවස්‌ථා හෝ යෙදේ.
මේ නිසා ඕනෑම නිවසකට දොරටු (උළුවහු) තැබීමේදී අශුභ පාද මගහැර දෝෂ ඉවත්කර ශුභ පාදවලදීම තැබීම කළ යුතුය. මෙහිදී ඇතුල්වන ප්‍රධාන දොරද පිටවන දොරද ඉහත සඳහන් කළ ශාස්‌ත්‍රීය ක්‍රමයටද නිවස ඇතුළත තබන දොරටු දිග පළල 15 න් බෙදන ක්‍රමයටද තැබීම කළ යුතුය.
මේවායේ වැදගත්කම අනුව දෝෂවල බලපෑමද ප්‍රධාන අප්‍රධාන වනු ලබයි.
ඉහත කී දෝෂවලට මූලිකම හේතුව නම් වැරදි සහගත නිවාස සැලසුම්ය. නිවාස සැලසුම් පරීක්‌ෂාවේදී බොහෝ සැලසුම් ශාස්‌ත්‍රයට අනුකූලව නොමැතිවීම අද ඉතා බහුලව දැකිය හැකිවේ.
උළුවහු ගැන කතා කිරීමේදී උළුවස්‌සේ නියමිත දිග පළල, නිවසේ තැබීමට සූදානම් වන සම්පූර්ණ උළුවහු ප්‍රමාණය තැබීමට සූදානම් වන ස්‌ථාන ගැන දැඩි අවධානයක්‌ යොමු කළ යුතුය. නියමිත පරිදි ශාස්‌ත්‍රානුකූලව සාදන ලද උළුවස්‌සක්‌ අශුභ දෝෂ සහිත ස්‌ථානයක තැබීමද පාද බෙදීමෙන් දෝෂ භංග කර ලබාගන්නා ශුභ ස්‌ථානයක ප්‍රමිතියට අනුව සකස්‌ නොකළ උළුවස්‌සක්‌ තැබීමද නිෂ්ඵල ක්‍රියාවක්‌ වන අතර මේ සඳහා ජන්ම පත්‍ර පරීක්‌ෂා කර ශුභ නැකත් ලබාගෙන ඒ අනුව කටයුතු කිරීමද නිෂ්ඵලය. ඒ අනුව ශුභ වේලාවට ශූභ ස්‌ථානයක ශාස්‌ත්‍රානුකූලව සාදාගත් උළුවහු තැබීමෙන් පමණක්‌ හැමවිටම ඔබට ශුභඵල ලබාගත හැකි බව කිව හැකිය.
කුමන තරාතිරමේ වඩු කාර්මිකයකු ලවා ඔබේ උළුවහු දොර ජනෙල් තනා ගත්තේ ඒ සඳහා පාරම්පරිකව පැවත එන නිවැරදි වත්පිළිවෙත් ඉටුකළ යුතුමය. වඩු කර්මාන්තයට ප්‍රධාන විස්‌කම් දෙවියන් උදෙසා වත් පිළිවෙත් මනාලෙස ඉටුකරලීම අටකොණ දුතීයන් පිදීමද කළ යුතුය. නියමාකාර උළුවස්‌සක උස ගැනීමේදී පළල මෙන් දෙගුණයක්‌ ගත යුතු වුවද එය අද ශාස්‌ත්‍රීය දිග පළලින් බැහැර වීම බොහෝ විට දක්‌නට ලැබෙන කාරණයකි. දෙපසට ජනෙල් පියන් සම්බන්ධ කිරීම උළුවස්‌ස ජනේලය සමග එකට සැදීම උස අඩි 8 ලෙස ගන්නා උළුවස්‌සක්‌ පළල අඩි 7 ක්‌ ලෙස ගැනීම ආදී ඉතාම වැරදි ක්‍රම අද උළුවහු සෑදීමේදී නොදැනුවත්කමින් සිදුවන අශුභ ක්‍රියාවන්ය. වෙනත් නිවසක, ආයතනයක යොදා තිබෙනවා දුටු පමණින් එය තම නිවසට ආයතනයට තම සැලසුමට ගැලපේ යෑයි සිතා අශුභ ශක්‌තීන් තම නිවසට කැන්දාගැනීමද ඉතා භයානක බව සිහිතබා ගත යුතුය.
එදා මෙන් අද මනා ලෙස වඩු කර්මාන්තයට අනුකූල නියමිත ශාස්‌ත්‍රීය ක්‍රම තමන් වෙත එන සේවාදායකයාට ලබාදීමට තරම් නිහතමානී නොවන මුදලම තම අරමුණ කරගත් සමහර වඩු කාර්මිකයන් විසින් සකස්‌ කර දෙන දෝෂ සහිත දොර ජනෙල් උළුවහු ආදියේ බරපතල විපාක විඳීමට තම ගෘහයේ ඔවුන් ජීවත් නොවන බවත් ඒ හැම ආපදාවකටම මුහුණ දෙමින් බාධක මැද දිවිගෙවීමට සිදුවන්නේ නිවෙස්‌ හිමියන්ට බවත් මතක තබා ගනිමින් ඔබ වාසය කිරීමට සාදාගන්නා පැල්පත හෝ ශාස්‌ත්‍රානුකූලව ගොඩ නඟා එහි දොර ජනෙල් උළුවහු ක්‍ෂේත්‍රය ගැන මනා දැනීම් ඇති වාස්‌තුවිද්‍යාඥයකුගේ උපදෙස්‌ මත ශාස්‌ත්‍රානුකූලව, පාරම්පරික වඩු කාර්මික සිරිත්, ක්‍රමවලට අනුව ශාස්‌ත්‍රීය පදනම මත සාදවා නියමිත පුද සිරිත්වලට අනුව ශුභ වේලාවෙන් ශුභ ස්‌ථානවල තබාගැනීමට කටයුතු කිරීමෙන් අනවශ්‍ය දුක්‌ කරදර වලින් මිදී සුවසේ එහි වාසය කිරීමට ඔබට හැකිවනු නොඅනුමානය.
ජෝතිර්විද්‍යා හා වාස්‌තුවිද්‍යා උපදේශක
පී. ආර්. ආරියරත්න
