බුදු හාමුදුරුවනේ, යම් කාරණයකින් මිනිස්‌සු වෙලා ඉපදුනත් මේ මිනිස්‌සුන්ගේ වෙනස්‌කම් තියනවනේ. ඒකට හේතුව මොකක්‌ද? සමහර මිනිස්‌සුන්ට දීර්ඝ ආයුෂ තියෙනවා. සමහරුන්ගෙ ආයුෂ කෙටියි. සමහර මිනිස්‌සුන්ට ලෙඩ රෝග බොහොමයි. ඒත් තවත් සමහරු නිරෝගියි. සමහරුන්ගෙ පෙනුම හරිම දුර්වර්ණයි. සමහරු ලස්‌සන වර්ණවත් මිනිස්‌සු. සමහරුන්ට මහේශාක්‍ය පෙනුමක්‌ තියෙනවා. සමහරුන්ට එහෙම නෑ. සමහර මිනිස්‌සු හරිම ධනවත්. සමහරු දුප්පත්. තවත් සමහර අය උසස්‌ කුලවලත් සමහර අය පහත් කුලවලත් ඉපදිනවා. ඒ වගේම සමහර අය හරිම බුද්ධිමත් ප්‍රඥවන්තයි. සමහරු මෝඩයි. මෙහෙම වෙන්නෙ ඇයි? කියලයි ශුභ මානවකය බුදු හාමුදුරුවන්ගෙන් ඇහුවෙ.
ශුභ මානවකය ඇහුව මේ ප්‍රශ්නෙත් බුදුහාමුදුරුවො ඊට හේතු පැහැදිලි කළ ක්‍රමයත් අද සමාජෙ ජීවත් වන අපට ගොඩක්‌ ප්‍රයෝජනවත් වෙනවා. මේ ප්‍රශ්නෙට මුලින්ම බුදුහාමුදුරුවො දුන්නෙ කෙටි උත්තරයක්‌.
සියලු සත්ත්වයෝ කර්මය උරුමකොට ඇත්තාහුය. කර්මය නෑයා කොට ඇත්තාහුය. කර්මය පිහිට කොට ඇත්තාහුය. මෙලොව යම් උසස්‌ පහත් බවක්‌ ඇත්ද එය කර්මයෙන් සිදු වන්නේය කියලයි බුදුහාමුදුරුවො පැහැදිලි කළේ.
එතකොට ශුභ මානවකය කියනවා "අනේ බුදුහාමුදුරුවනේ විස්‌තර කරල දෙන්නෙ නැතුව මට මේක තේරෙන්නෙ නෑ. මට අනුකම්පා කරල කර්මයෙන් මිනිස්‌සු වෙනස්‌ වෙනව කියන කාරණේ පැහැදිලි කරල දෙන්න" කියල.
ජ්‍යෙdතිෂයේදී ජන්ම පත්‍රය නැතිනම් කේන්ද්‍රය කියන සටහනේ තියෙන්නෙත් කර්ම විපාක හඳුනා ගන්න පුළුවන් සංකේතයි. ඉතිං ඉහත ලියෑවුණු "චුල්ල කම්ම විභංග" සූත්‍රයේ එන විස්‌තර ජ්‍යෙdතිෂය අනුව සස¹ බලන්නයි මේ ලිපිය වෙන් කළේ.
ග්‍රහයන් යම් යම් දේවල් කරනවද? සෙනසුරු කකුල කැඩුවා. රාහු ඇවිද්දවනව, සිකුරු විවාහය සිද්ධ කළා. වගේ කතා වැරැදියි. ජ්‍යෙdතිෂය ගැන දුර්මත ඇතිවෙලා තියෙන්නෙ මේ වගේ වැරැදි අර්ථ කථන නිසයි. ඇත්ත වශයෙන් ම වෙන්නෙ මිනිස්‌සුන්ට සිද්ධ වෙන කර්ම විපාක අනුව සිද්ධ වෙන දේවල් ග්‍රහයන්ගේ පිහිටීම්වලින් පෙන්නාදීමයි. දැන් අපි ආයෙමත් අර ශුභ මානවකයගෙ ප්‍රශ්නවලට බුදුහාමුදුරුවො දුන්න පිළිතුරු ගැන බලමු.
ආයුෂ අඩුවීම
යම් කෙනෙක්‌ කිසිම අනුකම්පාවක්‌ දයාවක්‌ නැතිව සත්තු මරණව නම් ඒ අය අල්පායුෂව උපදිනව කියල බුදුහාමුදුරුවො දේශනා කළා. මේ කාලෙත් සමහරු උපන් හැටියෙමත්, තරුණ කාලෙත් මැදි වයසෙත් මැරෙනව. මේ උපදිනකොටම ලැබෙන ආයුෂයි. ආයුෂ ගැන ජ්‍යෙdතිෂ ග්‍රන්ථවලත් කියෑවෙනවා. යම් කෙනකුගෙ ලග්නාධිපති ග්‍රහයා ගොඩක්‌ බලවත් නම් ඒ අයට දීර්ඝ ආයුෂ තියෙනව. ලග්නාධිපති වගේම ලග්න භාවය දුර්වලනම් ඒ අයට ආයුෂ අඩුයි. ඒකට හේතුව පෙර ආත්මයක ප්‍රාණ ඝාතය කරල එකතු කරගෙන කියන අකුශල කර්මයයි.
ආයුෂ වැඩිවීම
සියලු සතුන් කෙරෙහි කරුණාව දයාව දක්‌වන, සතුන් මැරීමෙන් වැළකුණු අයට ගොඩක්‌ ආයුෂ තියෙනව කියල බුදුහාමුදුරුවො පැහැදිලි කළා. ශුභ ග්‍රහයෙක්‌ ලග්නාධිපති වෙලා ඒ ග්‍රහයත් ලග්නයත් බලවත් නම් ආයුෂ වැඩියි.
ආබාධ වැඩිබව
රෝගාබාධ වැඩිවීමට හේතුව, අතින් පයින් හරි , දඬු මුගුරුවලින් හරි වචනයෙන් හරි සතුන් තලා පෙලා දැමීම බව බුදුහාමුදුරුවො පැහැදිලි කළා. එහෙම සත්ව කරුණාව නැතිව උපන් අයගේ රෝaගස්‌ථානය හෙවත් කේන්ද්‍රයේ හයවැන්න දුර්වල වෙනවා. ලග්නපති දුර්වලව හය වැන්නේ නම් බොහෝවිට උපදින්නේ නිතරම රෝගීව ඉන්න කෙනෙක්‌.
නිරෝගී වීම
යම් කෙනෙක්‌ සත්ව හිංසාව කළේ නැත්නම් සත්ව කරුණාව තිබුණා නම් ඒ අය දිව්‍ය ලෝකයේ උපදිනව. මනුෂ්‍යයෙක්‌ වෙලා ඉපදුනොත් බොහොම නිරෝගියි කියලයි බුදු හාමුදුරුවො පැහැදිලි කළේ.
කේන්ද්‍රයක රවි ග්‍රහයා බලවත් නම් ඔහු හෝ ඇය නිරෝගි බව දැන ගන්න පුළුවනි. රවි, මේෂ, සිංහ රාශිවලින් 10 වැන්නේත් තැන්පත් වනවිටත්, ශුභ ග්‍රහයන්ගේ සංයෝග දෘෂ්ඨිවලිනුත් බලවත් වෙනවා.
දුර්වර්ණ වීම
යම් ස්‌ත්‍රියක්‌ හරි පුරුෂයෙක්‌ හරි ඉක්‌මනට කේන්ති ගන්නව නම්, ක්‍රෝධ කරනව නම්, කරන සතුරුකම් ඒ අය අතරෙ උපදින බවත් යම් කාලෙක මනුෂ්‍ය ආත්මයක්‌ ලබනව නම් ඒ ආත්මෙදි ලස්‌සන නැති දුර්වර්ණ කෙනෙක්‌වෙලා උපදින බවත් බුදුහාමුදුරුවො පැහැදිලි කළා.
වර්ණවත් (ලස්‌සන) වීම
ක්‍රෝධ කරන්නේ නැති තරහ යන්නෙත් නැති, සතුටින් ගත කරන අය මනුෂ්‍ය ආත්මයේ උපදින කොට රූමත්ව උපදින බවත් වදාලා. එවැනි අයගේ කේන්ද්‍රයේ ලග්නයේ සිකුරු බලවත් බව පේනවා. ලග්නපති, බුධ, සිකුරු බලවත් අය ලස්‌සනයි.
අල්පේශාක්‍ය / මහේශාක්‍ය බව
සමහරුන් ශාක්‍ය පෙනුමක්‌ තියෙනවා. පිරිවර ඕනතරම් ඉන්නවා. කැපිල පේනවා. ඒත් සමහරු එහෙම නෑ. සභාවක කැපිල පේන්නෙ නෑ. පිරිවර නෑ. බුදුහාමුදුරුවො මේකට හේතුව ඊර්ෂ්‍යාව බව සඳහන් කළා. අනුන්ගේ සැප සම්පත් දිහා බලල ඊර්ෂ්‍යාවෙන් දැවෙන නො ඉවසන අය මරණින් මතු අපායේ උපදින බවත් මනුෂයෝ වෙලා උපදින කොට අල්පේශාක්‍යව උපදින බවත් වදාළා. ඊර්ෂ්‍යාව නැතිව අනුන්ගේ සැප දිහා බලල සතුටුවෙන අය මහේශාක්‍යව උදින බවත් සඳහන් කළා. ලග්න භාවය දුර්වල වී සෙනසුරු, හේතු වැනි පාප ග්‍රහයන් ගේ බලපෑම එල්ලවීම පුද්ගලයා අල්aපේශාක්‍ය බව පෙන්වනවා.
ධනවත්වීම හා දුප්පත් වීම
යම් කෙනෙක්‌ ශ්‍රමණයන් වහන්සේලාට දන් දුන්නා නම් ඒ අය ධනවත්ව උපදින බවත් දන් දීමට ලෝභ කම් කළ, කිසිම දනක්‌ පිනක්‌, නොකළ අය දුප්පත්ව උපදින තවත් බුදු හිමියන් පැහැදිලි කළා. එහෙම පින් කරලා උපතින්ම ධනවතුන් වීමට වාසනාව ඇති අයගේ කේaන්ද්‍රවල දෙවැන්න හෙවත් ධනස්‌ථානයක්‌ 11 වැන්නක්‌ බලවත් වෙනවා.
උසස්‌ කුලවලත්/ නීච කුලවලත් ඉපදීම
බුදුරජාණන් වහන්සේ කුල වාදය අනුමත කරල නෑ. ඒත් ධනවත්, කුලවත් මෙන්ම දුගී දුප්පත් පවුල් තියෙනවා. බුදු හිමියන් වදාලේ ගරු කළ යුත්තන්ට ගරු නොකරන මානයෙන් අහංකාරකමින් ආඩම්බරයෙන් කටයුතු කරන අය නීච කුලවල උපදින බවයි. ඒ වගේම අහංකාර නැති, ගරු කළ යුත්තන්ට ගරු සත්කාර කරන අය උසස්‌ පවුල්වල උපදින බවයි.
ලග්නය ශුභ වීම, ලග්නාධිපති ලග්නයේම බලවත්ව සිටීම ශුභ ග්‍රහයන් ලග්නය දැක්‌ම වැනි කාරණා නිසා ජන්මියා බලවත් කුසලකර්ම ශක්‌තියකින් ඉපදී ඇති බවත් එවැනි අයට යහපත් මව්පියන් මෙන්ම, ගේදොර, සමාජ තත්ත්වය ආදිය උරුම වන බවත් ජ්‍යෙdතිෂයේ සඳහන් වෙනවා.
ප්‍රඥවන්ත වීම හා අඥනයකු වීම
ජීවිතය නිවැරැදිව සකස්‌ කර ගැනීමට උගත් බුද්ධිමත් ස්‌වාමින් වහන්සේලා හමුවී උපදෙස්‌ අවවාද ලබාගත් අය මරණින් මතු මනුෂ්‍යයකු වී උපදින විට ප්‍රඥවන්තයන් වෙන බවත් එවැනි පණ්‌ඩිතයන් ආශ්‍රය නොකළ, උපදෙස්‌ ලබා නොගත් අය අඥනයෙක්‌වී උපදින බවත් වදාළා.
ජන්ම පත්‍රයක සඳු බලවත් අය බුද්ධිමත් සඳු හතර වැන්න, කටක, වෘෂභ රාශිවල බලවත් වෙනවා. ඒ වගේම 5 වැන්න 9 වැන්න බලවත් අය ඉගෙනීමට දක්‍ෂ ප්‍රඥවන්ත අය බව පේනවා. ගුරු බුධ සඳු සිකුරු බලවත්ව යෝග වීම ඥන යෝගයන් වෙනවා.
චුල්ල කම්ම විභංග සූත්‍රයේ අවසානයට ආයමත් වරක්‌ බුදු රජාණන් වහන්සේ සුභ මානවකයාට මතක්‌ කර දෙන්නේ කර්මය සියලු සතුන් විසින් උරුමකොට, දායාද කොට, නෑයාකොට පවතින බවයි.
ජ්‍යෙdතිෂය මගින් ජීවිත ගැටලුවලට විසඳුම් පෙනෙන විට මතක තබා ගත යුත්තේ ජන්ම පත්‍රයක්‌ මගින් පෙන්වා දෙන්නේ මේ ජීවිතය ගැන පමණක්‌ නොවන බවයි.
උරුම වන ලෙඩ රෝග, ධනය බලය, නැතිනම් සිදුවන විවාහය, ගෙවල් දොරවල් ආදී සියල්ල පෙර කර්ම සමග බැඳී පවතිනවා. ඒ ග්‍රහයන් කරන දේවල් නොවේ. බෞද්ධ කර්මවාදය හා පුනර්භවය සංකල්පය කදිමට තහවුරු කරන සාක්‍ෂියක්‌ ලෙස පුද්ගලයකුගේ කේන්ද්‍රය හඳුන්වා දිය හැකියි.
මතුවට සංසාරය පුරා දීර්ඝ ගමනක්‌ අපට යන්න තියෙනවා. ඒ රැස්‌ කරන කර්ම අනුවයි. සමහර කර්ම මේ ලෝකයේ දීම පළ දෙනවා. ඒ නිසා මේ ගැන සැලකිලිමත් වීම අත්‍යවශ්‍යයි.
අවසාන වශයෙන් කිව යුත්තේ ලෝබ වෙන්න එපා. දුප්පතෙක්‌ වේවි. සත්තු මරන්න එපා. ආයුෂ අඩුවේවි. සතුන්ට හිරිහැර කරන්න එපා. රෝගියෙක්‌ වේවි. තරහ ගන්න එපා. අල්පේශාක්‍ය වේවි. ආඩම්බර වෙන්න එපා. පහළට වැටේවි. උගත් හාමුදුරුවන්ගේ උපදෙස්‌ ගන්න. නැතිනම් අඥනයෙක්‌ වේවි.
හැකි තරම් දානය දෙන්න ධනවත් වෙයි. ප්‍රාණඝාතයෙන් වලකින්න. දීර්ඝායුෂ ලැබෙයි. සත්ව කරුණාව දක්‌වන්න. නිරෝගි වෙයි. තරහව අත්හැර කාරුණික වන්න. මහේශාක්‍ය වෙයි. ගරු කළ යුත්තන්ට ගරු කරන්න. තවත් උසස්‌ වෙයි. උගත් ස්‌වාමින් වහන්සේලා ඇසුරු කරන්න. උපදෙස්‌ ගන්න. මහා ප්‍රඥවන්තයෙක්‌ වේවි. ඒ අප සම්මා සම්බුදුරජාණන් වහන්සේගේ ධර්මයයි.
සුනිල් කුමාර ගම්ලත්
